آزادلیق گیلایلی
بو گئجه گلمدی بوز قوردومون سسی داغلاردان
داغلار اونو سسلر ، اونو گؤزلر ، اونو ایستر
چیینینده ، بئینینده گونش داشییان قیلیجلی آسلانیم
اورمان – مئشه ایچره کوکرییب تولکو قاچدیرانیم
قفس – بوخوو چکیر قول- قیچیندا
اینله ییر دلی جئیرانیم
داغلار آغلار ، اورمان سیزلار
من کدرلی ، بووخوو گیلایلی
****
آشا _ آشا بو یوللاری بو چایلاری
چاتار کن دنیزلره بره لره
گوز قاماشدیران آغ بنیزلی گؤزللره
گؤیول وئریب اوره ک آلان سئو گیلی لر
گورمه دیکده آسلان کیمی ایگیتی
قوخلادیقدا ایتگین یوسوفون قانلی کؤینگین
بیر باخار بیر سورار بیر دورار بیر یانار
من کدرلی ، دنیز گیلایلی
***
قارا چکمه لر قان یورغانین آیاقلیر
آزادلیق معماری ایسه
بیر قولاقدا دوشوب گونش سوراقلیر
ییرتیجی کافتارلار آسلانیمی ساللاخلیر
تیتره ییر گؤزلریمده یاش
آخی نه ائدیر بو اوباش
گؤردونمو آی، قان ایچینده قانلی قارداش ؟
بیر داها اولما سنده ، قلم قاش
آغلا سازیملا ، آغلا سؤزومله
من کدرلی ، آزادلیق گیلایلی
***
آی سهندیم ، آی ساوالانیم
آی گوک کیمی بوجاقسیز ماوی دنیزیم عمانیم
کؤمور گؤزلو نازلی جئیرانیم
آی آذربایجانیم
آغلاما سن ، اینله مه سن
اود بو کدری
چؤن بومبایا ، اول آلوو
قوی آخان قانلار داغیتسین
قارا چکمه لرین ، قانلی یاراغین